Hartenbos Seefront

Klein-Kariba herontwikkeling

Koswerf

Kos is op die tafel!

Die ATKV-oorde spog nou met ses unieke nuwe restaurante met die naam van Koswerf.

Die handelsmerkuitbreiding van die ATKV is nou oop by Eiland Spa, Buffelspoort, Klein-Kariba, Natalia, Drakensville en Goudini Spa. Vakansiegangers kan nou kies uit verskeie aantreklike, moderne en bekende geregte wat hulle nog meer bederf sal laat voel.

Die restaurante skep ’n rustige gesins- en vakansieatmosfeer en is net die plek om saam met familie en vriende te kuier.

Die Koswerf-spyskaarte bied waarde vir geld en daar is iets vir elke gesinslid ongeag by watter ATKV-oord jy uitspan. Daar is hard gewerk om te verseker dat daar ’n wye verskeidenheid gebalanseerde geregte beskikbaar is, almal  kleurryk en stylvol en reg vir wegval. Raak solank lus vir ’n Koswerf-ontbyt of tuisgemaakte beesvleisburger met gekaramelliseerde uie en agurkies. Die biltongslaai en salami-deegkarossie sal ook beslis treffers wees. En moenie praat van die Koekel-doedel-doo pizza nie! Vir die suikertand is daar ’n koue grenadella-kaaskoek ‒ lekker!

 

Schalk Cilliers, die ATKV se uitvoerende direkteur: sake, vertel meer oor hierdie restaurante:

Wat is Koswerf?

Die naam Koswerf is afgelei van die woord, Food Court, soos dié in groot winkelsentrums in en om Johannesburg. Daar is gewoonlik verskeie restaurante, formeel en informeel, in ’n Food Court en ons het dié gedagte deurgetrek na die oorde. Koswerf sal spyseniering doen vir die oorde se restaurante en kitskosplekke, asook vir konferensiegroepe, spesiale geleenthede soos troues en sosiale byeenkomste van byvoorbeeld senior burgers.

Wat was die inspirasie agter die herontwikkeling van die restaurante by die oorde?

Die restaurante het die potensiaal om goeie, winsgewende besighede in eie reg te wees en die herontwikkeling fokus daarop. Die nuwe spyskaarte, dekor en diens moet hierdie doelwit ondersteun en dit moet ’n rede wees om ’n ATKV-oord te wil besoek.

Wat is die toekomsplanne vir Koswerf?

Die toekomsvisie is om Koswerf as ’n franchise te posisioneer en ’n voetspoor te ontwikkel buite die ATKV-oorde.

Wat is jou gunsteling dis op die Koswerf-spyskaart?

Ongetwyfeld die Koswerf-spesialiteitsteaks!

Die vrou agter die geure

Spysenieringskonsultant, Heleen Meyer, gesels oor die watertandgeregte:

Waardeur is die spyskaart geïnspireer?

Die huidige, meer moderne tendense in kos. Ons wou iets skep wat modern, vars en regtig geurig is, maar wat gaste steeds ken en geniet. Daar is beslis ’n poging om ook gesonder en ligter geregte beskikbaar te stel.

Hoe gaan die spyskaart ontwikkel word?

Daar sal beslis seisoenale toevoegings wees, soos soppe in die winter. Items soos die slaaie en pizzas kan ook van tyd tot tyd aangepas word. Die plan is verder om die basiese spyskaart in die restaurante ook by konferensies en ander funksies te gebruik of minstens te laat oorvleuel. Dit sal dinge vir die kombuise net soveel makliker maak en gaste sal bekend wees met baie van die geregte. Die geregte sal wel op interessante en nuwe maniere voorgesit word as dit byvoorbeeld vir ’n formele geleentheid berei moet word.

Wat is jou gunstelingdis op die Koswerf-spyskaart?

Die Groentemark-pizza met geroosterde botterskorsie, gekaramelliseerde uie en fetakaas. Dis iets nuut en interessant en die personeel was tydens die opleiding baie opgewonde daaroor. Die karos met salami, tamatie, kaas en gekaramelliseerde uie het ook groot aftrek gekry, omdat dit so ’n geurige kombinasie is. Die Koswerf-slaai is iets wat ek gereeld sal eet. Konsepte soos die Koswerfslaai, Koswerf-burger en Koswerf-ontbyt is ook baie opwindend en vorm ’n sterk deel van die hele Koswerf-konsep.
 

Laai die ATKV Koswerf spyskaart hier af

 

Galery